Сотору кэминэн – ахсынньы 14 күнүгэр 100 сааһын туолуохтаах Бүлүү улууһун ытык кырдьаҕаһа, Саха Өрөспүүбүлүкэтин норуодунай учуутала, «РСФСР үтүөлээх учуутала», «Саха АССР үтүөлээх учуутала», «ССРС үөрэҕириитин туйгуна», Саха Өрөспүүбүлүкэтин, Дьокуускай куорат, Бүлүү улууһун, Бороҕон нэһилиэгин Бочуоттаах олохтооҕо Николай Иванович Афанасьев төрөөбүт Бүлүүтүн улууһун «Олох суола» хаһыатын суруйууларын куруук билсэр, сэргиир, ырытар.
Ытык киһибит улууһун хаһыатыгар суруттарбыта 70 сылтан орто, кини киэҥ сэҥээриини ылбыт оҕону иитиигэ, норуот үөрэҕириитин сайыннарыыга, кыраайы үөрэтиигэ элбэх суруйуулара хаһыат киэн туттуутунан буолаллар.
Сэрии кэмигэр пуолка разведчига, кэлин дьоппуон тылыттан байыаннай тылбаасчыт, Бүлүү улууһугар олорор соҕотох Аҕа дойду улуу сэриитин кыттыылааҕа Николай Иванович Афанасьев улууһун олоҕун улуус хаһыатыттан билэ-көрө олорор, хаһыат таһаарар бэйэтэ сайтаах, ВК курдук социальнай ситимнэргэ, Телеграмҥа, Макска сырдатар-билиһиннэрэр ханааллардаах редакция үлэтин өйүүрүн биллэрэр уонна дьон хаһыакка хото суруттарарыгар ыҥырар:
— Сахалыы уонна нууччалыы тылынан тахсар оройуон хаһыатын үтүөтэ биһиэхэ үтүмэн элбэх буоллаҕа. Хаһыат көрөр харахпыт, истэр кулгаахпыт буолар. Оройуон олоҕун сайдыытыгар туох ситиһиилэр, итэҕэстэр баалларын ааҕабыт, истэбит.
Хаһыат үтүө сүбэһиппит буолар. Биһиги Бороҕон оскуолатын кэлэктиибэ хаһыакка куруук махтана саныыбыт. Оройуон хаһыатыгар биһиги үлэбит, кыраайы үөрэтэр үлэбит туһунан суруйууларбыт бэчээттэннэхтэринэ улахан өйөбүл курдук саныырбыт.
Үлэ өссө да тупсарыгар, тирэх буоларыгар баҕарабыт. Оҕо төрөөбүт дойдутун туһунан элбэҕи билэр, онон хаһыат оҕо патриот санаата сайдарыгар туһалыыр.
Оройуон хаһыатын кэлэктиибигэр бар дьоҥҥут туһугар айымньылаах үлэни баҕарабын.
Мин хаһыакка 1952 сыллаахтан, «Колхуос суола» эрдэҕиттэн суруттарабын. Кэлин оройуоммут хаһыата «Октябрь суола», онтон «Олох суола» буолбута. Билигин да улууспут хаһыатыгар суруттарабын, элбэх сонуну билэбин, истэбин.
Улуус олохтоохторун бэйэҕит «Олох суола» хаһыаккытыгар суруттараргытыгар ыҥырабын!
* * *
Ытык киһибит, сэрии бэтэрээнэ Николай Иванович Афанасьев Бороҕон оскуолатыгар үлэлиэҕиттэн оройуонун хаһыатын кытта ыкса сибээһи тутуһар. Хаһыакка кини киһини толкуйдатар элбэх суруйууларын аҕам саастаах ааҕааччыларбыт сэргээн аахпыттара чахчы.
Кини ордук сахатын тылынан суруйууларын бэлиэтиэххэ сөп. Билигин улуус хаһыата улууска саха литературнай тылынан тахсар соҕотох таһаарыы буолар. Итини сэргэ бэйэтин сайтыгар, социальнай ситимнэргэ эмиэ сахалыы суруйуулары таһаарар.
Билиҥҥи Интернет үйэтигэр Саха сирин сонуннарын тарҕатар сайтарга сахалыы суруйуу суоҕун да кэриэтин бэйэҕит билэ-көрө сылдьаҕыт.
Хаһыат – билигин туттулла сылдьар саха тылын киэҥник тарҕатыыга, билиигэ-көрүүгэ, таба суруйууга төһүү күүс буолар. Бэйэтин тылын билэр, төрөөбүт тылынан суруйуулары ааҕар, ырытар омук инникилээх!
Саха тыллаах хаһыаттарбытын харыстыахха, саха тылын өйүүрбүтүн биллэрэн суруттарыахха, ааҕыахха, дьүүллэһиэххэ!
Николай Куприянов
Куприянов, Николай. Сэрии бэтэрээнэ Николай Афанасьев «Олох суола» хаһыакка суруттарарга ыҥырар / Николай Куприянов – Текст : электронный // UlusMedia : [сетевое издание]. – 18.12.23. – URL: https://xn--80avakbauqq.xn--p1ai/serii-betereene-nikolaj-afanasev-oloh-suola-ha%d2%bbyakka-suruttararga-y%d2%a5yrar/ (дата обращения: 04.12.25)